ເພື່ອປະຕິບັດຕາມແຈ້ງການຂອງຄະນະເລຂາທິການ ລັດຖະບານສະບັບເລກທີ 1796/ຄລບ; ລົງວັນທີ 2 ຕຸລາ 2009 ກ່ຽວກັບໃຫ້ຈັດຕັ້ງປຸກລະດົມບໍລິຈາກ ເພື່ອຊ່ວຍເຫລືອ ຜູ້ປະສົບເຄາະຮ້າຍຈາກໄພນ້ຳຖ້ວມ ຢູ່ບັນດາແຂວງພາກໃຕ້.ກະຊວງແຮງງານ ແລະ ສະຫວັດດີການສັງຄົມ ຕາງຫນ້າໃຫ້ລັດຖະບານ ສປປ ລາວ ຂໍຖືເປັນກຽດແຈ້ງຂ່າວມາຍັງ ບັນດາອົງການຈັດຕັ້ງພັກ  ລັດ, ອົງການຈັດຕັ້ງສັງຄົມ, ເອກະຊົນ, ອົງການຈັດຕັ້ງສາກົນທັງພາຍໃນ ແລະ ຕ່າງປະເທດ, ຕະຫລອດເຖິງອົງກອນພຸດທະສາສະຫນາ ແລະ ປະຊາຊົນລາວ ບັນດາເຜົ່າທຸກຖ້ວນຫນ້າ. ຄືດັ່ງບັນດາທ່ານໄດ້ຮູ້ກັນແລ້ວວ່າ: ສະພາບດິນຟ້າອາ  ກາດ ຂອງໂລກໃນປະຈຸບັນມີການຜັນແປຢູ່ຕະຫລອດເວລາ  ເວົ້າລວມ ເວົ້າສະເພາະຢູ່ ສປປ ລາວ ຂອງ ພວກເຮົາໃນວັນທີ 28-30/9/2009 ທີ່ຜ່ານມານີ້ ໄດ້ມີລົມພາຍຸເກດສະຫນາລູກ ທີ 16 ພັດເຂົ້າບັນດາ ແຂວງທາງພາກກາງ ແລະ ໃຕ້ຂອງປະເທດເຮົາ ໂດຍສະເພາະແມ່ນແຂວງສະຫວັນນະເຂດ, ເຊກອງ, ສາລະວັນ ແລະ ອັດຕະປືຊຶ່ງໄດ້ເຮັດໃຫ້ເກີດມີລົມແຮງ ແລະ ຝົນຕົນຫນັກຕິດຕໍ່ກັນຫລາຍຊົ່ວໂມງຈາກນັ້ນ ໄດ້ເຮັດໃຫ້ນໍ້າ ໃນຫ້ວຍນໍ້າລຳເຊ ຍຶ່ງຂຶ້ນໄວ ແລະ ໄຫລສຸຖ້ວມເອົາເຮືອນຊານບ້ານຊ່ອງ, ໂຮງຮຽນ, ໂຮງຫມໍ, ພື້ນຖານໂຄງລ່າງ, ເນື້ອທີ່ການຜະລິດເປັນຈຳນວນຫລວງຫລາຍເຮັດໃຫ້ມີຜູ້ເສຍຊີວິ ແລະ ສູນຫາຍຈຳນວນຫນຶ່ງ ແລະ ສ້າງຄວາມເສຍຫາຍແກ່ຊັບສິນຂອງລັດ ແລະ ປະຊາຊົນພົນລະເມືອງ ເປັນຈຳນວນບໍ່ຫນ້ອຍ, ຜ່ານການປະເມີນຄວາມເສຍຫາຍ ແລະ ການລາຍງານເບື້ອງຕົ້ນຂອງແຂວງ ສະຫວັນນະເຂດ, ເຊກອງ ແລະ ອັດຕະປື ສາມາດຊ່ວຍໃຫ້ພວກເຮົາຮູ້ໄດ້ວ່າ: ຢູ່ແຂວງເຊກອງມີ 4 ເມືອງ, 29 ບ້ານຖືກກະທົບ, ເຮືອນເສຍຫາຍ 197 ຫລັງ, ສັດລ້ຽງງົວ, ຄວາຍ 939 ໂຕ, ຫມູ 401 ໂຕ, ແບ້ 229 ໂຕ ແລະ ສັດປີກ 1.204 ໂຕ, ເນື້ອທີ່ນາຖືກນໍ້າຖ້ວມ 109 ເຮັກຕາ, ຄາດຄະເນຜົນ ເສຍຫາຍເບື້ອງຕົ້ນປະມານ 40 ກ່ວາຕື້ກີບ. ຢູ່ແຂວງອັດຕະປືມີ 5 ເມືອງ, 53 ບ້ານ, ຄົນຕາຍ 9 ຄົນ (ໄດ້ຊາກສົບແລ້ວ 1 ຄົນ), ມູນຄ່າຄວາມເສຍຫາຍເບື້ອງຕົ້ນຕໍ່ຊັບສິນຂອງປະຊາຊົນ ແລະ ຂອງລັດ ມີ ມູນຄ່າຈຳນວນ 4.094.876.000 ກີບ, ຄາດຄະເນຄວາມເສຍຫາຍຕໍ່ພື້ນທີ່ການຜະລິດ ເຂົ້າຂອງ ປະຊາຊົນບໍ່ຫລຸດ 90% ຂອງເນື້ອທີ່ ຫລື ເທົ່າກັບ 13.000-18.000 ກ່ວາເຮັກຕາ, ພື້ນທີ່ການຜະລິດ ອື່ນໆນອກຈາກເຂົ້າເຊັ່ນ: ພືດ, ຕົ້ນໄມ້ກິນຫມາກຄາດຄະເນເສຍຫາຍຫລາຍກ່ວາ 3.000 ເຮັກຕາ, ສັດລ້ຽງເສຍຫາຍ 10 ບ້ານຂອງ 5 ເມືອງເຊັ່ນ : ຄວາຍ 427 ໂຕ, ງົວ 703 ໂຕ, ແບ້ 161 ໂຕ, ຫມູ 1.036 ໂຕ, ສັດປີກ 7.998 ໂຕ, ຄວາມເສຍຫາຍກ່ຽວກັບຊັບສິນເຊັ່ນ : ເຮືອນ, ເຄື່ອງໃຊ້ໄຟຟ້າ, ເຄື່ອງໃຊ້ຄອບຄົວ, ສະບຽງອາຫານ, ເງິນ, ຄຳ ແລະ ອື່ນໆ ເສຍຫາຍຫລາຍກ່ວາ 300 ຕື້ກີບ. ຄວາມ ເສຍຫາຍທາງດ້ານໂຄງລ່າງເຊັ່ນ: ຂົວ ແລະ ທາງໃນເບື້ອງຕົ້ນປະມານ 38.505.000.000 ກີບ, ຊົນລະ ປະທານປະມານ 30.368.380.000 ກີບ. ຢູ່ແຂວງສະຫວັນນະເຂດ 5 ເມືອງ, 29 ບ້ານ ແລະ 7.410 ຄົນ ຖືກກະທົບ, ຕາຍ 2 ຄົນ, ພື້ນທີ່ນາຖືກນໍ້າຖ້ວມຈຳນວນ 382,3 ເຮັກຕາ, ເນື້ອທີ່ສວນ 600 ເຮັກຕາ. ດ້ວຍຄວາມເປັນຫ່ວງເປັນໄຍຕໍ່ບຸກຄົນ ແລະ ຄອບຄົວຜູ້ທີ່ປະສົບເຄາະຮ້າຍຈາກໄພພິບັດໃນຄັ້ງນີ້, ພາຍຫລັງທີ່ໄດ້ຮັບຮູ້ຂໍ້ມູນລາຍງານກ່ຽວກັບເຫດການໄພນໍ້າຖ້ວມທີ່ເກີດຂຶ້ນ, ໃນວັນທີ 30 ກັນຍາ 2009 ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງປ້ອງກັນປະເທດ, ປະທານຄະນະກຳມະການ ຄຸ້ມຄອງໄພພິບັດແຫ່ງຊາດໄດ້ນຳພາທີມງານຊ່ວຍເຫລືອກູ້ໄພພ້ອມທັງອຸປະກອນ ແລະ ພາຫະນະຕ່າງໆ ຂອງກອງກຳລັງທະຫານລົງສົມທົບກັບອຳນາດການປົກຄອງທ້ອງຖິ່ນຈັດຕັ້ງປະຕິບັດຊ່ວຍເຫລືອສຸກເສີນຮີບດ່ວນ, ຊຶ່ງໄດ້ເຮັດໃຫ້ຜູ້ປະສົບເຄາະຮ້າຍມີຄວາມປອດໄພ ແລະ ໄດ້ຮັບການຊ່ວຍເຫລືອບັນເທົາທຸກ ໃນ ເບື້ອງຕົ້ນ. ວັນທີ 3 ຕຸລາ 2009 ທ່ານນາຍົກລັດຖະມົນຕີ ພ້ອມກັບພາກສ່ວນກ່ຽວຂ້ອງໃນຄະນະ  ລັດຖະບານໄດ້ລົງຕິດຕາມຊ່ວຍເຫລືອບັນເທົາທຸກອົບອຸ່ນອຳນາດການປົກຄອງ ແລະ ປະຊາຊົນຜູ້ທີ່ຖືກ ກະທົບຈາກໄພພິບັດໃນຄັ້ງນີ້. ພ້ອມກັນນັ້ນກໍ່ໄດ້ມີການວາງແຜນຊ່ວຍຟື້ນຟູຊີວິດການເປັນຢູ່ຂອງປະຊາຊົນ
ໃຫ້ກັບຄືນສູ່ສະພາບປົກກະຕິ ໂດຍໄວໂດຍການລະດົມກຳລັງຂອງທະຫານ.
- ຕຳຫລວດທຸກກົມກອງ ແລະ ຜູ້ອາສາສະຫມັກຊາວຫນຸ່ມເຂົ້າຮ່ວມຊ່ວຍເຫລືອຢ່າງຕັ້ງຫນ້າ. ນອກຈາກນີ້ ກໍ່ຍັງມີຫລາຍພາກສ່ວນນັບທັງພາກລັດ, ເອກະຊົນ ທຸລະກິດ, ບັນດາບໍລິສັດ, ບັນດາແຂວງ ໄດ້ປະກອບ ສ່ວນຊ່ວຍເຫລືອທາງດ້ານວັດຖຸຕ່າງໆໃນເບື້ອງຕົ້ນເຊັ່ນ: ເຄື່ອງນຸ່ງຫົ່ມ, ເຂົ້າກິນ, ຜ້າເຕັ້ນກາງນອນ, ນໍ້າດື່ມ, ອາຫານແຫ້ງ ແລະ ອື່ນໆ… ສະນັ້ນ, ເພື່ອເສີມຂະຫຍາຍມູນເຊື້ອສາມັກຄີ, ຄວາມເອື້ອເຟື້ອ ຊ່ວຍເຫລືອເຊິ່ງກັນ ແລະ ກັນຂອງປວງຊົນລາວເຮົາ ໃນການຊ່ວຍເຫລືອແກ້ໄຂຊີວິດການເປັນຢູ່ ຂອງ ຜູ້ປະສົບເຄາະຮ້າຍຈາກໄພພິບັດນໍ້າຖ້ວມໃນຄັ້ງນີ້, ນະໂອກາດນີ້ ຂ້າພະເຈົ້າໃນນາມຕາງຫນ້າລັດຖະບານ ສປປ ລາວ ກໍ່ຄືກະຊວງແຮງງານ ແລະ ສະຫວັດດີການສັງຄົມ ອີກເທື່ອຫນຶ່ງຂ້າພະເຈົ້າ ຂໍຮຽກຮ້ອງ ມາຍັງອົງການຈັດຕັ້ງທຸກພາກສ່ວນທັງພາກລັດ - ເອກະຊົນ, ບັນດາຊັ້ນຄົນໃນສັງຄົມ, ພາກສ່ວນ ທຸ ລະກິດ, ບໍລິສັດ, ຫ້າງຮ້ານ, ພະນັກງານລັດຖະກອນ, ອົງການຈັດຕັ້ງທາງສັງຄົມ ແລະ ວິຊາຊີບ ເພື່ອ ປະກອບສ່ວນເຂົ້າໃນການຊ່ວຍເຫລືອຜູ້ປະສົບເຄາະຮ້າຍ ແລະ ຟື້ນຟູບູລະນະພື້ນຖານວັດຖຸເຕັກນິກ ແລະ ຊີວິດການເປັນຢູ່ໃຫ້ເປັນປົກກະຕິໂດຍໄວ, ຊຶ່ງການບໍລິຈາກນັ້ນຈະເປັນເງິນ, ເປັນເຂົ້າຂອງເຄື່ອງໃຊ້ໃນ ຄອບຄົວ ຫລື ອຸປະກອນການຜະລິດ, ເປັນເຄື່ອງອຸປະໂພກ - ບໍລິໂພກ, ຢາປົກພະຍາດ ແລະ ອື່ນໆ ທີ່ ຈຳເປັນໃນການດຳລົງຊີວິດກໍ່ໄດ້. ສຳລັບຜູ້ທີ່ມີນໍ້າໃຈສັດທາຢາກໃຫ້ການບໍລິຈາກຊ່ວຍເຫລືອ ສາມາດ ບໍລິຈາກໄດ້ທີ່ສູນຮັບການບໍລິຈາກຢູ່ກະຊວງແຮງງານ ແລະ ສະຫວັດດີການສັງຄົມໃນໂມງລັດຖະການ
ໂທລະສັບ: 222776, 219450. 213005
ມືຖື: 020 5628905, 5654494, 5939925, 5606269
ແຟັກ: 252685, 213287 ຫລື ທ່ານ ສາມາດໂອນເງິນເຂົ້າບັນຊີຫມາກເລກລຸ່ມນີ້:
ທະນາຄານການຄ້າຕ່າງປະເທດລາວ